نیویارک (ایم این این) پاکستان کرکٹ ٹیم کے سابق کپتان اور مایہ ناز آل راؤنڈر شاہد آفریدی نے اقوام متحدہ کے ہیڈکوارٹرز کا دورہ کیا، جہاں اقوام متحدہ میں پاکستان کے مستقل مندوب سفیر عاصم افتخار احمد نے ان کا استقبال کیا۔ یہ دورہ سفیر عاصم افتخار احمد کی دعوت پر انجام پایا۔
دورے کے دوران شاہد آفریدی کو اقوام متحدہ کے ہیڈکوارٹرز کا تفصیلی دورہ کرایا گیا اور انہیں عالمی ادارے کے قیام کے مقاصد، بین الاقوامی امن و سلامتی کے فروغ، پائیدار ترقی، کثیرالجہتی تعاون اور سفارتی کردار سے متعلق بریفنگ دی گئی۔
اقوام متحدہ کے ہیڈکوارٹرز میں ہونے والی ملاقات کے دوران سفیر عاصم افتخار احمد نے شاہد آفریدی کو پاکستان کرکٹ کے لیے ان کی شاندار خدمات پر خراج تحسین پیش کیا اور کہا کہ انہوں نے اپنے جارحانہ کھیل، دلکش کارکردگی اور یادگار اننگز کے ذریعے دنیا بھر میں لاکھوں کرکٹ شائقین کے دل جیتے ہیں۔
سفیر عاصم افتخار احمد نے شاہد آفریدی کی فلاحی اور انسان دوست سرگرمیوں کو بھی سراہتے ہوئے کہا کہ ان کے رفاہی اقدامات نے خصوصاً پسماندہ طبقات اور ضرورت مند افراد کی زندگیوں پر مثبت اثرات مرتب کیے ہیں۔
اس موقع پر سفیر عاصم افتخار احمد نے کہا کہ کھیل سفارتکاری کا ایک مؤثر ذریعہ ہیں جو سرحدوں، زبانوں اور ثقافتوں سے بالاتر ہو کر اقوام اور عوام کو ایک دوسرے کے قریب لاتے ہیں۔ انہوں نے کہا کہ کھیل امن، خیر سگالی، باہمی احترام اور بین الاقوامی تعاون کے فروغ کے لیے ایک مضبوط پلیٹ فارم ثابت ہو سکتے ہیں۔
سفیر عاصم افتخار احمد نے شاہد آفریدی کو اقوام متحدہ میں پاکستان کے مستقل مشن کی سرگرمیوں سے بھی آگاہ کیا اور بتایا کہ پاکستان عالمی سطح پر کثیرالجہتی نظام، مذاکرات، سفارتکاری اور بین الاقوامی امن و سلامتی کے فروغ کے لیے فعال کردار ادا کر رہا ہے۔
شاہد آفریدی نے اقوام متحدہ کے دورے کی دعوت اور پرتپاک میزبانی پر سفیر عاصم افتخار احمد اور پاکستان مشن کا شکریہ ادا کیا۔ انہوں نے اقوام متحدہ میں پاکستان کے مستقل مشن کی خدمات کو سراہتے ہوئے کہا کہ یہ مشن اقوام کے درمیان باہمی افہام و تفہیم، مذاکرات، تعاون اور تنازعات کے پرامن حل کے فروغ میں اہم کردار ادا کر رہا ہے۔
شاہد آفریدی نے اس بات پر زور دیا کہ کھیل اور سفارتکاری کے امتزاج کے ذریعے دنیا بھر کے عوام کے درمیان فاصلے کم کیے جا سکتے ہیں اور ایک زیادہ پرامن، مستحکم اور تعاون پر مبنی عالمی ماحول تشکیل دیا جا سکتا ہے۔
اس موقع پر اقوام متحدہ میں پاکستان کے نائب مستقل مندوب سفیر عثمان جدون اور پاکستان مشن کے دیگر افسران بھی موجود تھے۔ بعد ازاں سفیر عاصم افتخار احمد نے شاہد آفریدی کے اعزاز میں عشائیہ بھی دیا۔
یہ دورہ اس امر کی عکاسی کرتا ہے کہ کھیل اور سفارتکاری مل کر عالمی سطح پر امن، ہم آہنگی اور باہمی تعاون کے فروغ میں مؤثر کردار ادا کر سکتے ہیں
