اسلام آباد (ایم این این): راولپنڈی میں پولیس نے بڑے پیمانے پر آٹے کی مبینہ اسمگلنگ کے خلاف کارروائی کرتے ہوئے 131 ٹن آٹا خیبرپختونخوا منتقل کرنے کی پانچ مختلف کوششیں ناکام بنا دیں۔ کارروائیوں کے دوران آٹے سے بھرے ٹرک قبضے میں لے لیے گئے جبکہ ڈرائیور قانونی دستاویزات پیش نہ کر سکے۔
راولپنڈی پولیس نے اسلام آباد اور پنجاب سے خیبرپختونخوا آٹا اسمگل کرنے کی پانچ مختلف کوششیں ناکام بنا دیں۔
پولیس کے مطابق کارروائیوں کے دوران مجموعی طور پر 131 ٹن آٹا برآمد کیا گیا، جو اسلام آباد، روات، سرگودھا، فورٹ عباس اور رحیم یار خان سے خیبرپختونخوا منتقل کیا جا رہا تھا۔
کارروائی کے دوران آٹے کی ترسیل میں استعمال ہونے والے تمام ٹرک قبضے میں لے لیے گئے۔ پولیس کا کہنا ہے کہ ٹرک ڈرائیور آٹے کی نقل و حمل سے متعلق کوئی قانونی دستاویز یا اجازت نامہ پیش نہیں کر سکے۔
دوسری جانب اسسٹنٹ فوڈ کنٹرولر راولپنڈی ظفر اقبال رانا نے قانونی کارروائی کے لیے تھانہ ایئرپورٹ میں تحریری درخواست بھجوا دی ہے، جس کے بعد متعلقہ قوانین کے تحت مزید کارروائی کا آغاز کر دیا گیا ہے۔
پولیس کا کہنا ہے کہ غیر قانونی آٹے کی نقل و حمل اور اسمگلنگ کے خلاف کارروائیاں بلاامتیاز جاری رہیں گی تاکہ عوام کو آٹے کی فراہمی متاثر نہ ہو اور ذخیرہ اندوزی و اسمگلنگ کی حوصلہ شکنی کی جا سکے۔
