استنبول/اسلام آباد (ایم این این): وزیراعظم شہباز شریف جمعہ کے روز ترک صدر رجب طیب اردوان کی دعوت پر سرکاری دورے پر ترکیہ پہنچ گئے، جہاں وہ دوطرفہ تعلقات، تجارت، سرمایہ کاری اور علاقائی صورتحال پر اعلیٰ سطحی مذاکرات کریں گے۔
اس سے قبل وزیراعظم شہباز شریف تہران میں ایران کے مرحوم سپریم لیڈر آیت اللہ علی خامنہ ای کی نمازِ جنازہ میں شرکت اور تعزیت کے بعد استنبول روانہ ہوئے۔
استنبول کے اتاترک ایئرپورٹ پر ترک وزیر تجارت پروفیسر ڈاکٹر عمر بولات، ترکیہ میں پاکستان کے سفیر ڈاکٹر یوسف جنید، ترک وزارت خارجہ اور پاکستانی سفارت خانے کے اعلیٰ حکام نے وزیراعظم کا استقبال کیا۔
وزیراعظم کے ہمراہ نائب وزیراعظم و وزیر خارجہ سینیٹر اسحاق ڈار اور وفاقی وزیر اطلاعات و نشریات عطا اللہ تارڑ بھی موجود ہیں۔
سرکاری بیان کے مطابق وزیراعظم شہباز شریف اور صدر رجب طیب اردوان کے درمیان ہونے والی ملاقات میں پاکستان اور ترکیہ کے دوطرفہ تعلقات کے تمام پہلوؤں پر تفصیلی بات چیت ہوگی، جس میں تجارت، سرمایہ کاری اور اقتصادی تعاون کے فروغ پر خصوصی توجہ دی جائے گی۔
دونوں رہنما علاقائی اور عالمی صورتحال، امن و سلامتی سے متعلق اہم امور پر بھی تبادلہ خیال کریں گے۔
استنبول میں قیام کے دوران وزیراعظم شہباز شریف پاکستان کے زیر اہتمام منعقد ہونے والی ایک بزنس کانفرنس سے بھی خطاب کریں گے، جس کا مقصد اسپیشل اکنامک زونز (SEZs)، توانائی، انفارمیشن ٹیکنالوجی اور نجکاری سمیت مختلف شعبوں میں سرمایہ کاری کے مواقع اجاگر کرنا ہے۔
کانفرنس میں ترکیہ کے ممتاز کاروباری رہنما، سرمایہ کار، اعلیٰ سرکاری حکام اور مختلف شعبوں سے تعلق رکھنے والی اہم شخصیات شرکت کریں گی تاکہ دونوں ممالک کے درمیان تجارتی اور سرمایہ کاری کے نئے مواقع کا جائزہ لیا جا سکے۔
پاکستان اور ترکیہ کے درمیان تعلقات مشترکہ مذہبی، ثقافتی اور تاریخی رشتوں، باہمی احترام اور مضبوط اسٹریٹجک شراکت داری پر استوار ہیں۔
یہ دورہ ایسے وقت میں ہو رہا ہے جب گزشتہ ہفتے استنبول میں پاکستان اور ترکیہ نے توانائی کے شعبے میں ادارہ جاتی تعاون، تکنیکی اشتراک اور تجربات کے تبادلے کو فروغ دینے کے لیے تین مفاہمتی یادداشتوں (ایم او یوز) پر دستخط کیے تھے۔
یہ معاہدے پاکستان کے انڈیپنڈنٹ سسٹم اینڈ مارکیٹ آپریٹر (ISMO) اور انرجی ایکسچینج استنبول (EPIAS)، ISMO اور ترکش الیکٹرسٹی ٹرانسمیشن کارپوریشن (TEIAS)، جبکہ پاور پلاننگ اینڈ مانیٹرنگ کمپنی (PPMC) اور ترکش الیکٹرسٹی ڈسٹری بیوشن کارپوریشن (TEDAS) کے درمیان طے پائے، جن کا مقصد دونوں ممالک کے توانائی کے شعبے میں تعاون کو مزید مضبوط بنانا ہے۔
