پشاور (ایم این این): خیبرپختونخوا کے ضلع بنوں میں سکیورٹی فورسز نے انٹیلی جنس اطلاعات کی بنیاد پر کامیاب کارروائی کرتے ہوئے کم از کم سات دہشت گردوں کو ہلاک کر دیا اور اسلحہ و بارود سے بھری ایک گاڑی کو تباہ کر دیا۔
سکیورٹی ذرائع کے مطابق کارروائی بکا خیل تحصیل کے علاقے گھوڑا بکا خیل میں کی گئی، جہاں دہشت گردوں کی مشکوک نقل و حرکت کی مصدقہ اطلاعات موصول ہوئی تھیں۔ اطلاع ملنے پر سکیورٹی فورسز نے فوری کارروائی کرتے ہوئے ایک مشتبہ گاڑی کو نشانہ بنایا، جو ایک سرکاری اسکول کے قریب کھڑی تھی۔
ذرائع کے مطابق کارروائی میں کواڈ کاپٹر کے ذریعے گاڑی کو انتہائی درستگی کے ساتھ نشانہ بنایا گیا۔
سکیورٹی حکام کا کہنا ہے کہ گاڑی میں بھاری مقدار میں اسلحہ اور دھماکا خیز مواد موجود تھا، جس میں 12.7 ملی میٹر ہیوی مشین گن، راکٹ پروپیلڈ گرینیڈز (آر پی جیز)، مارٹر گولے اور دیگر مہلک ہتھیار شامل تھے۔
حملے کے نتیجے میں زوردار دھماکہ ہوا جس سے گاڑی مکمل طور پر تباہ ہوگئی، جبکہ ابتدائی اطلاعات کے مطابق گاڑی میں سوار تمام سات دہشت گرد موقع پر ہی ہلاک ہوگئے۔ بعض اطلاعات کے مطابق گاڑی میں آٹھ دہشت گرد بھی موجود ہو سکتے تھے۔
کارروائی کے بعد سکیورٹی فورسز نے علاقے میں سرچ اور کلیئرنس آپریشن شروع کر دیا تاکہ کسی بھی ممکنہ خطرے کا خاتمہ کیا جا سکے۔ واقعے کی مزید تحقیقات بھی جاری ہیں۔
ضلع بنوں گزشتہ کئی ماہ سے دہشت گردی کے متعدد واقعات کی زد میں ہے، جہاں دہشت گرد مسلسل سکیورٹی فورسز، پولیس چوکیوں اور سرکاری تنصیبات کو نشانہ بنانے کی کوشش کر رہے ہیں۔
چند روز قبل دہشت گردوں نے کواڈ کاپٹر کے ذریعے حوید پولیس اسٹیشن پر دو دھماکا خیز آلات گرائے تھے، جس کے نتیجے میں فرنٹیئر کور کے دو اہلکار معمولی زخمی ہوگئے تھے۔
اس سے قبل رواں ماہ ضلع بنوں میں ایک مبینہ دہشت گرد کمانڈر سمیت تین افراد مختلف کارروائیوں میں مارے گئے تھے، جبکہ دہشت گردوں نے ایک اہم رابطہ پل کو تباہ کرنے کی بھی کوشش کی تھی۔
گزشتہ ماہ دہشت گردوں کے ساتھ شدید جھڑپوں میں دو پولیس اہلکار اور دو شہری شہید ہوگئے تھے، جبکہ سکیورٹی فورسز اور مقامی امن کمیٹی نے مشترکہ کارروائی کے دوران 25 دہشت گردوں کو ہلاک کر دیا تھا۔
